हो तिमीले राज गरेको थियौ
मेरो मनभित्र
वर्षौंदेखि
मैले नै हो निकालेको
तिमीलाई
चाहिँदैन तिमी अब
पर्दैन फर्केर आउन तिमी
फेरि गर्नलाई शासन म माथि
चाहे जति नै कराउन
क्षणभरका भ्रमहरू
कसैले उक्साको भरमै
तिमी चाहिन्छ भन्ने
यी बेकामका यादहरु
चाहिएको छैन मलाई तिम्रो शासन
हो मलाई थाहा छ
जसले अहिले गरिरहेछन्
मेरो मनमाथि शासन
उनीहरू पनि
त्यही तिम्रै शैलीको निस्के
गर्दैछन् म र
मेरो मनमाथि दोहन
बुझ्न सकेका छैनन् म र मेरा भावहरू
तर तिम्रो फर्काई
यसको समाधान होइन
तिमी नआउनु नै
मेरो लागि उत्तम हुनेछ
चाहे मरुन् लाखौं
भ्रममा परेर
भेडा जस्तै भ्या भ्या गर्ने
विचारहरू,
अह मलाई चाहिएको छैन तिमी
बरु मेरो मनको दोहनै सही
म बोल्न पाएको छु
व्यक्त गर्न पाएको छु मेरो भावहरू
र बिस्तारै सबै समाधान हुने
आसहरू पलाउँदैछन्
एकदिन परिवर्तन हुन्छ
अवश्य हुन्छ
सायद हुनेछु म पनि शहिद
तर मलाई तिमी फेरि
चाहिएको छैन